जातीय छुवाछुत विरुद्ध एक जुट भएर अगाडि बढ्नु पर्ने

 ०७० चैत ८ गते, सिरहा ।४९ औँ अन्तराष्ट्रिय जातीय विभेद विरुद्धको दिवस सिरहाको धनगढीमा विभिन्न कार्यक्रम सहित चैत ७ गते समपन्न भएको छ । मानवअधिकार संरक्षण केन्द्र सञ्जाल सिरहाको आयोजना र इन्सेक सिरहा, दलित जनकल्याण युवा कल्ब लहान, ओरेक सिरहा,सहयोगी हातहरु लहान, दलित महिला सङ्घ मिर्चैया, समग्र जनउत्थान केन्द्र लहान लगायतका संस्थाको सहकार्यमा धनगढीमा र्‍याली, सडक नाटक, कोणसभा तथा सहभोजको आयोजना गरिएको थियो ।

कोणसभामा बोल्दै समग्र जनउत्थान केन्द्रका अध्यक्ष सुनिलकुमार साहले समय परिवर्तन सँगै सबै जना परिवर्तन हुनु पर्ने बताए । समाजमा छुवाछुत जस्ता कुपर्थाले विकासको कामम पनि बाधा पुग्ने भएको र जातीय छुवाछुत विरुद्धको ऐनले कार्बाहीको भागीदारी बन्नु पर्ने भएको हुँदा यस्तो विचार त्यागी एक जुट भएर अगाडि बढ्नु पर्ने बताए ।

मानवअधिकार संरक्षण केन्द्र संजालका संयोजक नथुनी मंडलले मान्छे-मान्छे बीच भेदभाव गर्नु कानुनी अपराध भएकोले सो कार्य नगर्न आग्रह गरेका थिए ।कार्यक्रममा जातीय विभेद विरुद्ध जनचेतना मूलक नाटक प्रदर्शन दलित जनकल्याण युवा क्लबका नाटक टोलीले गरेको थियो । कार्यक्रमको अन्तिम चरणमा दलितहरुले तयार गरेको भोज संस्थाका प्रतिनिधि, समाज सेवी, शिक्षक तथा स्थानीयहरुले सँगै खाएर कार्यक्रम समापन गरिएको थियो ।