बादी समुदायका पाँच युवाले पाए जागिर

सम्राट सिंह/नयाँ पत्रिका
बझाङ, १८ कात्तिक
बझाङका बादी समुदायका युवाले पहिलोपटक जागिरको अवसर पाएका छन् । युवाले जागिर पाएपछि सिंगो बादी समुदाय नै खुसी भएको छ ।

०५८ सालमा पहिलोपटक एसएलसी पास गरेका सदरमुकाम चैनपुरका सुरेन्द्र बादीसहितका पाँच युवाले प्रमुख जिल्ला अधिकारी हरि प्याकुरेलको पहलमा जागिर पाएका हुन् । सुरेन्द्रलाई प्रजिअ प्याकुरेलले जिल्ला मालपोत कार्यालयमा सुपरभाइजरको पदमा र अन्य साधारण लेखपढ गर्न सक्ने टेक बादी, बम्म बादी, रमेश बादी र बलु बादीलाई सुर्मा सामुदायिक प्रहरी सेवा केन्द्रमा फोहोर व्यवस्थापक पदमा जागिर लगाइदिएका हुन् ।

जागिर पाएपछि सुरेन्द्र आइतबारबाट मालपोत कार्यालयमा हाजिर भएका छन् भने फोहोर व्यवस्थापकको जिम्मेवारी पाएकाहरूले पनि बजारबाट फोहोर उठाउन थालेका छन् । प्रजिअ प्याकुरेलले बझाङमा सबैभन्दा पछाडि परेको बादी समुदायको अवस्था दयनीय देखिएकाले उनीहरूलाई जागिरको व्यवस्था गरिदिएको बताए । ‘सुरेन्द्र पढेलेखेका भएकाले मालपोतमा र अन्यलाई सुर्मा सामुदायिक प्रहरी सेवा केन्द्रमा फोहोर व्यवस्थापकमा राखिएको हो,’ प्याकुरेलले भने ।

गरिबी, अशिक्षा र जनचेतना नभएका कारण बादी समुदाय पुस्तौँदेखि गाउँमा मागेर खाने गथ्र्यो भने महिलाहरू यौन व्यवसाय गरी जीविकोपार्जन गर्दै आएका थिए । मालपोत कार्यालयमा जागिरे भएर अफिस जाँदै गर्दा सुरेन्द्रले यसरी आफूहरूले जागिर पाउनु ऐतिहासिक भएको बताए । ‘बादी समुदायका लागि प्रमुख जिल्ला अधिकारीले ठूलो गुन लगाएका छन्, एकैपटक पाँचजनाले जागिर पाउनु ऐतिहासिक कुरा भएको छ,’ उनले भने ।

सुरेन्द्र बादीले जिल्ला मालपोत कार्यालयको मुक्त हलिया पुनस्र्थापना कार्यक्रमअन्तर्गत सुपरभाइजर पदमा नियुक्ति पाएका हुन् । खरिदार तहको पदमा रहेका सुरेन्द्रको मासिक तलब १७ हजार ७ सय ३० रुपैयाँ रहेको मालपोत कार्यालयले जनाएको छ । यता बजारको फोहोर व्यवस्थापक अन्य बादीको मासिक तलब पाँच हजार रहेको सुर्मा सामुदायिक प्रहरी सेवा केन्द्रका अध्यक्ष गोकुल सिंहले बताए । ‘अहिले चैनपुर जयपृथ्वी नगरपालिका पनि भएकाले नगरपालिका र हाम्रो संस्थाले संयुक्त रूपमा फोहोर व्यवस्थापनको जिम्मा पाएको छ । बादीहरूले राम्रो काम गरे पछि नगरपालिकाले नै स्थायी रूपमा राख्नेछ,’ सिंहले भने ।

सदरमुकाम चैनपुरका चारजना र थलारा खोलीका एकजना गरी पाँचजना बादीले जागिर पाएपछि उनीहरूको समुदायको आर्थिक अवस्थामा पनि सुधार आउने स्थानीयको भनाइ छ ।