तल्लो जातसँग विहे गरेको भन्दै आफ्नै छोरीमाथि कुटपिट

पिडित संगिता पत्रकारसँग कुरागर्दै।तस्वीरः नारायण ढुंगाना

नारायण ढुंगाना चितवन, माघ १३ 

चितवनको जुटपानीमा पानी छोएको निहुँमा आफ्नै आमाले छोरीमाथि निर्घात कुटपिट गरेकी छिन्।

अन्तरजातीय विवाह गरेकी जुटपानी ७ सुर्यपुरकी २१ बर्षिय संगिता लामा परियारलाई आमा धनमायाँ तामाङ , दिदी शर्मिला र गाउँकी अर्की एक महिलाले सामुहिक रुपमा कुटपिट गरेको पिडित संगिताले दुखेसो गरिन्।

 आफूलाई चिर्पटले हानेर घाईते बनाएको भन्दै उनले न्याय दिलाई दिन उहाँले सबैमा अपिल गरेकी छिन्।

तल्लो जातसँग विहे गरेको भन्दै यसअघि पटकपटक दुर्व्यवहार गर्ने गरेकोमा मंगलबार साँझ भने ईनारमा एक्लै भएको मौका पारेर कुटपिट गरेको पिडित संगिताले वताईन्। कुटपिटबाट टाउकाको विभिन्न भागमा चोट लागेको छ भने देव्रे खुट्टा फ्याक्चर भएको छ।

उनको अहिले भरतपुर मेडिकल कलेजमा उपचार भैरहेको नेपाल उत्पीडित जातीय मुक्ती समाज चितवनका सचिव नगेन्द्र प्रसाद उप्रेतीले जानकारी दिए। 

समाजकै अगुवाईमा कुटपिट गर्ने र जातीय भेदभाव गर्ने विरुद्ध आज प्रहरीमा उजुरी समेत परेको छ। समाजका सदस्य दिपक परियार र निवर्तमान अध्यक्ष सहदेव लकान्द्रीले कुटपिट गर्नेलाई कानुन अनुसार कारवाहीको माग गरे।

४ बर्षअघि पदमपुर ४ की संगिताले जुटपानी ७ का मनोज परियारसँग प्रेम विवाह गरेकी थिइन्।

त्यसपछि माईतीपक्षले पटकपटक मानसिक दुर्व्यवहार गर्दै आएका थिए।  मंगलबार भने कुटपिटमै उत्रीएर घाईते बनाएपछि घटना सार्वजनिक भएको हो।  

दलितसँग विहे गरेकी छोरी कुट्ने आमा प्रहरी खोरमा

चितवन : चितवनको जुटपानीकी एक महिलाले आफ्नै आमाविरुद्ध उजुरी दिएकी छिन् । तल्लो जातसँग बिहे गरेको भन्दै आमाले यातना दिएपछि ती महिलाले आफ्नै आमाविरुद्ध जिल्ला प्रहरी कार्यालय चितवनमा बुधबार उजुरी दिएकी छिन् । उजुरीका आधारमा प्रहरीले आज युवतीकी आमासहित तीनजनालाई पक्राउ गरेको छ ।

तल्लो जातको केटासँग गएको भन्दै विगत तीन वर्षदेखि यातना खप्दै आएकी जुटपानी–७ सूर्यपुरकी २१ वर्षीया सङ्गीता लामालाई आमाले कुटपिट गरी घाइते बनाएपछि उनले कारबाहीको माग गर्दै प्रहरीमा उजुरी दिएकी हुन् ।

सङ्गीतालाई आमा धनमाया तामाङ, दिदी शर्मिला र गाउँकी अर्की एक महिलाले सोमबार साँझ कुटपिट गरेको पीडित युवती सङ्गीताले दुखेसो गरिन् । त्यसपछि मङ्गलबार उनलाई उपचारका लागि भरतपुर मेडिकल कलेज ल्याइएको थियो ।
 
चिकित्सकले उनको खुट्टाको गोलीगाँठामा हड्डी फुटेको भन्दै एक महिना आराम गर्नुपर्ने बताएका छन् । उनको टाउकोमा समेत चोट लागेको छ । आफूलाई चिर्पटले हानेको पीडित युवतीले बताइन् । न्यायका लागि भरतपुर आइपुगेकी सङ्गीताले बुधबार प्रहरीमा उजुरी दिएकी छिन् ।

चितवनका प्रहरी प्रमुख सहकुलबहादुर थापाले उजुरी दर्ता भएको र घटनामा संलग्न भनिएका तीनजनालाई पक्राउ गरिएको जानकारी दिए । उनले कानुनअनुसार कारबाही हुने बताए । पक्राउ पर्नेमा आमा धनमायाँ लोप्चनसहित आइतीमायाँ तामाङ र अर्का एकजना छन् ।

तल्लो जातसँग बिहे गरेको भन्दै यसअघि पटकपटक दुर्व्यबहार गर्ने गरेकामा सोमबार साँझ भने इनारमा एक्लै भएको मौका पारेर कुटपिट गरेको पीडित सङ्गीताले बताइन् । चार वर्षअघि पदमपुर–४ की सङ्गीताले जुटपानी–७ का मनोज परियारसँग प्रेमविवाह गरेकी थिइन् । त्यसपछि माइतीपक्षले पटकपटक मानसिक दुर्व्यबहार गर्दै आएका थिए । रासस