हिमालय टाइम्समा कार्यरत पत्रकार हिरालाल विश्वकर्मा माथी अज्ञात समूहको आक्रमण

काठमाडौं, माघ १२ । हिमालय टाइम्स दैनिकमा कार्यरत पत्रकार हिरालाल विश्वकर्मामाथि सोमबार राति अज्ञात व्यक्तिहरुले आक्रमण गरी घाइते बनाएका छन् ।

मध्य बानेश्वर स्थित पत्रिकाको कार्यालयबाट काम सकेर घरतर्फ फर्कने क्रममा राति नौं बजे भेनस अस्पताल र पूजा प्रतिष्ठानको बीचमा नचिनेका व्यक्तिले उनीमाथि एक्कासी आक्रमण गरेका थिए।

आक्रमणकारीले उनको ढाडमा प्रहारी गरी लडाएर कुटपीट गर्दै साथमा रहेको केही पैसा र महत्वपूर्ण कागजात लिएर भागेका थिए । उनी हाल उपचारपछि आराम गरिरहेका छन् ।

नेपाल प्रेस युनियनका केन्द्रिय सदस्य तथा दलीत विभाग प्रमुख विश्वकर्मा हिमालय टाइम्सको प्रमुख संवाददाता समेत हुन । प्रेस युनियन केन्द्रिय समितिले आक्रमणको घोर निन्दा गर्दै आक्रमणकारीलाई कारवाहीको माग गरेको छ ।

महासचिब अजयबाबु शिवाकोटीले मंगलबार एक विज्ञप्ती जारी गर्दै राजधानीको सुरक्षा व्यवस्था फितलो रहेको र पत्रकारमाथि आक्रमण भएको ठहर गरेको छ । आक्रमण र लुटपाटको भत्सर्ना गर्दै दोषीहरुको पहिचान गरि कार्वाहीको दायरामा ल्याउन स्थानिय प्रसासन तथा प्रहरी प्रसासन समक्ष जोडदार माग गर्दछ, विज्ञप्तीमा उल्लेख छ ।