आर्थिक अभावका कारण एक दलित युवकको दाहसंस्कार हुन सकेन

कर्ण चन्द- विभेद बिरुद अभियान -  भाद्र १३ , डोटी – आर्थिक अभावका कारण मृत्यु भएको दुई दिन बितिसक्दा पनि एक दलित युवकको दाहसंस्कार हुन सकेको छैन । डोटी जिल्लाको दुर्गामाण्डौ गाउँ विकास समिति वार्ड नं. ८ चन्केसैन घर भई हाल अध्ययनको सिलसिलामा ललितपुर बस्दै आएका २५ बर्षिय अपांग ब्यक्ति हरि सिंह विश्वकर्माको यहि भदौ १० गते ललितपुर जिल्लाको ग्वार्को स्थित किष्ट अस्पतालमा उपचारको क्रममा मृत्यु भएको हो । मृतकको सब पोष्ट मार्टम गरी दाहसंस्कारका लागि सब बुझ्न अस्पतालले भनेपनि दाहसंस्कारका लागि आवश्यक रकम नहुँदा शव अस्पतालमै राखिएको छ ।

गरिब दलित परिवारमा जन्मेका बिश्वकर्मा जन्मजात दृष्टिबिहिन थिए । उनका जेठा दाई र दुई बहिनी छन् । २०६५ सालमा गाउँकै श्री झिमेमालिका उच्च मा.वि.बाट दोस्रो श्रेणीमा एस.एल.सि.उतिर्ण गरि उच्च शिक्षा अध्ययनका लागि काठमाण्डौं बस्दै आएका उनी एक्कासी बेहोस भई ढलेका थिए । बेहोस उनको किष्ट अस्पतालमा आईसियूमा राखेर उपचार भइरहेको थियो ।

तर उनको उपचारका क्रममा अस्पतालमै मृत्यु भएको हो । पाल्पा जिल्लाबाट गत पौष महिना बिवाह गरी श्रीमती मुना बि.क.का साथमा ललितपुर बस्दै आएका उनको अल्पायुमै मृत्यु भएपछि श्रीमती बेहास छिन् । बेहोस श्रीमतीको पनि किष्ट अस्पतालमै उपचार भई रहेको मृतकका साथी देविलाल पार्कीले बताए । सहयोगका लागि सम्पर्क गर्न चाहेमा देविलाल पार्कीको सम्पर्क नम्बर ९८४८७९८६७४ मा सम्पर्क गर्न सकिने रातो पाटीमा खबर छ  ।