‘तँ दलित १५ दिन भाछैन किन जन्मदर्ता लिन आइहालिस्’ भन्दै कुटपिट

विभेद बिरुद्ध अभियान - परासी,१ मंसिर – पाल्ही गाविसका सचिव नन्दलाल कुम्हालले गत आईतबार विहान गाविसमा छोरीको जन्मदर्ता लिन आएका स्थानिय करन हरिजनलाई गाली गर्दै थप्पड हानेको पीडितले बताएका छन् ।

छोरी जन्मेको १५ भएपछि, छोरीको जन्म दर्ता लिन गाविस पुगेका हरिजनलाई ‘तँ दलित १५ दिन भाछैन किन जन्मदर्ता लिन आइहालिस्’ भन्दै उनले कुटपिट गरेको पीडितले बताए ।

आइतबार विहान ११ बजेको समयमा गाविस सचिव एवं सहयोगीहरु कार्यालय बाहिर बसी घाम ताप्दै एव गफिदै गर्दा हरिजनले पटक पटक जन्म दर्ताको फर्म भर्न र बनाई दिन आग्रह गरेपछि सचिव कुटपीटमा उत्रिएको बताइएको छ ।

सेवाग्राहीको काम नगरी उल्टै जातिय विभेद गर्दै थप्पड हानेको दाबीसहित जिल्ला प्रशासन कार्यालयमा ज्ञापन पत्र दिँदै उनले प्रहरी कार्यालयमा उजुरी समेत दर्ता गगराएका छन् । गाविस सचिव कुम्हालले आफूले हरिजनलाई कुटपिट र गालीगलौज केहिपनि नगरेको दाबी गरे ।