गोरखामा धारिलो हतियार प्रयोग गरी विमला बयलकोटीको हत्या

विभेद बिरुद्ध अभियान - गोरखा, १३  फाल्गुण २०७३, ताकुमाझ लाकुरीवोट-९ डुम्रिस्वाँराकी ३७ वर्षीया विमला बयलकोटी धारिलो हतियार प्रयोग गरी हत्या गरेको अवस्थामा फेला परेकी छिन् । फागुन ९ गते १२ बजे घाँस लिन जङ्गल गएकी बयलकोटी साँझ अबेरसम्म घर नफर्किएपछि गाउँलेले खोजी गर्दा फागुन १० गते दिउँसो २ बजे उनी मृत अवस्थामा भेटिएकी हुन् ।

ताकुकोट-८ को जङ्गलमा मृतकको शव फेला परेको स्थानीय यम बयलकोटीले जानकारी दिए । बयलकोटीको टाउकोमा धारिलो हतियार प्रहार गरिएको प्रहरीले जनाएको छ ।

जिल्ला प्रहरी कार्यालयका डिएसपी विरेन्द्र थापाले मृतकको टाउकोमा तीन वटा गहिरो चोट देखिएको र घटनाको विस्तृत अनुसन्धान सुरु गरिएको जानकारी दिए । उनको हत्या कसले र किन गर्‍यो भन्ने थाहा हुन नसकेको भन्दै प्रहरीले अनुसन्धान सुरु गरेको जनायो । शवको पोष्टमार्टम फागुन ११ गते गोरखा अस्पतालमा गरिएको प्रहरीले जनाएको छ ।