सामान्य विवादमा निर्घात कुटिइन् रेखा विश्वकर्मा

रुजु खतिवडा–विभेद बिरुद्ध अभियान -मङ्सिर ८- पाँचथर । जिल्लाको फिदिम नगरपालिका ८ रानीटारकी ३२ वर्षीय रेखा विश्वकर्मालाई स्थानीय नरबहादुर गुरुङले सामान्य विवादमा कुटपिट गरेका हुन् ।नरबहादुरले विश्वकर्माकी १३ वर्षीय छोरीलाई लगाईफकाई घरको काममा लगाएको र आफ्नै घरमा ल्याउँछु भन्दा कुटिएको पीडित रेखाले बताइन् ।

‘मेरी छोरीलाई गुरुङले ललाईफकाई घरको काममा राखेका थिए । म आफ्नो छोरीलाई आफूसगैँ राख्न चाहन्छु । छोरीलाई घर लैजान्छु भन्दा गुरुङले मेरै घरमा आएर मंसिर १ गते साँझ ५ बजे दाउराको चीरपटले दुवै खुट्टामा पिटे । कसैले अस्पताल ल्याएनन् । यहि निको हुन्छ भन्दै अस्पताल जान पनि दिएनन्’– पीडित विश्वकर्माले भनिन् ।

पिटेको पाँच दिनपछि मात्रै उपचारका लागि पाँचथर जिल्ला अस्पताल ल्याइएको छोरा संजय विश्वकर्माले बताए ।

आर्थिक रुपमा कमजोर भएसगैँ बहिनीलाई ललाई–फकाई स्थानीय डम्वर गुरुङले लगेर घरेलु कामदारको रुपमा राखेको संजयको भनाई छ ।

आफन्तले घटनापछि रानीटारस्थित तमाखे प्रहरी चौकीमा निवेदन दिएपनि पीडक गुरुङलाई भने प्रहरीले पक्राउ गर्न सकेकोे छैन ।

पीडितका श्रीमान पूर्ण विश्वकर्माले घटनालाई गाउँमै मिलाउने भन्दै पीडितहरुले बाहिर ल्याउन नदिएको र अस्पताल जान समेत रोकेको बताए ।