पारिश्रमिक नबढ्ने भए नगरा बजाउनै छोड्ने मनसायमा परियार

विभेद बिरुद्ध अभियान - चैत १५ -मात्र रु १५०० मा नगरा बजाउँदै आएका मनहरी परियार भन्छन, ४ पुस्तादेखि नै आफ्नै पुस्ताले नगरा बजाउने गर्दै आएकाले आफुले पनि नगरा बजाउने काम नै गरँे । बिकासखबर सम्बाददाता संग कुराकानी गर्दै थाहा नगरपालिका वडा नं २ मा रहेको पाण्डुकेश्वर मन्दिरमा आफ्नो दैनिकी झै गरी बिहान र बेलुका नगरा लगाउने कार्य गर्दै आएका परियारले मासिक १ हजार ५ सय रुपैयाँ तलब पाउँदै आएको प्रति गुनासो ब्यक्त गरे ।

 पाण्डुकेश्वर क्षेत्र बिकास समितिले मन्दिरको संरक्षण, सरसफाई, नियमित नित्यपुजा र नगरा लगाउनको लागि ३ जनालाई तलबमा राखेको समितिका अध्यक्ष जनक हमालले बताएका थिए तर आफ्नो खटाइ अनुसारको तलबको ब्यवस्था नभएकोले काम गर्न मन नै नलागेको मनहरी परियारले बताए । हरेक दिन बिहान हुने लागेको संकेतको रुपमा सुर्योदयको २ घण्टा अगाडी र साँझ दिन ढलेको संकेत गर्दै बजाइने नगराले धार्मिक रुपमा पनि बिशेष महत्व राख्ने परियारले बताए । नगराको आवाज भगवानलाई सुनाउनै पर्छ भन्ने मान्यता पनि छ र साथै नगरा बजेपछि मानिसहरुले बिहानको समयमा उज्यालो भयो भनेर बुझ्छन भने साँझको समयमा भने रात पर्न लागेको संकेत÷जानकारी प्राप्त गर्छ, परियारले भने ।

५२ वर्ष पुगिसकेका परियारले भन्छन “मन्दिरको सेवा र कामबाट पाउने तलबले आफ्नो ३ जना परिवार पाल्न मात्र पुग्ने भएपनि काम गर्नमा मन जान्थ्यो, १ बोरा चामल पनि आउँदैन कसरी जिवीका चलाउने, आफु जहाँ पुगेपनि नगरा बजाउन आउनै पर्छ, यो भन्दा तलब सुबिधा नबढ्ने हो भने चाहीँ अब नगरा लाउन छोडीदिन्छु ।”

उनका अनुसार पाण्डुकेश्वर मन्दिर १८६६ सालमा स्थापना भएको बिषयमा बाँसको कलमले लेखेको लिखित प्रमाणहरु आफुसंग नै सुरक्षित भएको बताए । 

आफ्ना ४ पुस्ताले नै नगरा बजाउने काम गरेको हुनाले मन्दिरको बिषयमा जनसमुदाय भन्दा आफुलाई धेरै कुराहरु जानकारी भएको उनले बताए । आफुले नगरा लगाउन छोडे पनि मन्दिरको बिषयमा आफुसंग भएका प्रमाणहरु भने अरुलाई नदिने तर आवश्यक परेमा देखाउने उनको भनाइ रहेको छ । आफ्ना ४ रै वटा पुस्ताले गरेको कामलाई आफुले पनि गर्छु भनेर जिम्मा लिएँ र अहिले छोराहरुलाई पनि सिकाइरहेको छु तर उनीहरुले गर्ने या नगर्ने भन्ने कुरमा आफु बिश्वस्त भने नभएको उनले बताए । 

यसो त उनी आफैले पनि समितिलाई  तलब कम भयो भनि गुनासो राख्दा समितिमा पैसा नै छैन भन्ने गरेको बताउछन । उनका अनुसार शान्तिपुर सम्बाददाताले पाण्डुकेश्वर क्षेत्र बिकास समितिलाई तलबको बिषयमा कुरा राख्दा भने मन्दिरको आम्दानीको स्रोत नै नभएको कारण न्युन पारिश्रमिकमा चित्त बुझाउनु परेको अध्यक्ष जनक कुमार हमाल बताउछन ।राजनितिक बिषय भएको भए स्थानिय निकाय वा बिभिन्न संस्थाबाट पनि सहयोगहरु प्राप्त हुनेथियो तर धर्मिक बिषयमा भने मन्दिरमा चढाएका भेटी बहेक अन्य आम्दानी छैन, हमालले भने । उनका अनुसार समितिलाई डेढ लाखको घाटा रहेको छ । नगरा सधै नै बिहान र बेलुका बजाएर भगवानलाई सुनाउनु पर्छ भन्ने मान्यता रहेको कारण पनि नगरा नबजाउन भने नमिल्ने उनले दावी गरेको छ ।

स्रोत :- मञ्जरी बलामी/विकास खबर