बाहुन र दलितको जमरा एकै ठाउँमा

२० असोज, नुवाकोट । कथित माथिल्लो र तल्लो जातबीचको विभेद्लाई चुनौती दिंदै नुवाकोटको बेलकोटमा

बाहुन र दलितले सामूहिक रूपमा जमरा राखेर जातीय सद्भाव र सांस्कृतिक एकताको नमुना देखाएका छन् ।

यस वर्षको दसैंको घटस्थापनाका दिन शनिबार बेलकोट गाविस-३ मा रहेको निरञ्जना भगवती मन्दिरमा ब्राम्हण, क्षेत्री र मिजार, विश्वकर्माले संयुक्तरूपमा जमरा राखेका छन् । यस वर्ष मन्दिरमा ३ सय परिवारले सामूहिक जमरा राखेका छन् ।

बेलकोट गढीमा रहेको निरञ्जना भगवती मन्दिरमा भेला भएर बाहुनदेखि दलितसम्मको जमरा राखिएको पूजा सञ्चालन समितिका अध्यक्ष कालीबहादुर तिवारीले जानकारी दिनुभयो ।

पुस्तौँदेखिको चलनअनुसार उनीहरूले सामूहिक जमरा राखेका हुन् । सामूहिक जमरा राख्ने परम्पराले गाउँमा जातीय विभेद् कम गराउन भूमिका खेलेको स्थानीय बद्री मिजारले बताउनुभयो ।

यस मन्दिरमा पृथ्वीनारायण शाहको पालादेखि सामूहिक जमरा राख्दै आएको स्थानीयहरू बताउँछन् । पृथ्वीनारायण शाहको पालादेखि सो मन्दिरमा बडादशैँ र अन्य पर्व पूजा सञ्चालनको लागि गुठीको व्यवस्था गरिएको छ । तर आजभोलि गुठी जग्गाबाट कुतबाली उठ्न छाडेपछि पूजा सञ्चालनमा निकै कठिनाइ परेको बेलकोट गाविसका निवर्तमान अध्यक्ष बासुदेव कँडुवालले बताउनुभयो ।

नुवाकोटको साततले दरबार राष्ट्रिय सङ्ग्रहालय र सँगै रहेको तलेजु मन्दिरमा पनि विजया दशमीको लागि जमरा राखिएको छ । रासस

- Source:-onlinekhabar