पढाउँदै गरेका शिक्षक नमराज नेपाली माथी कुटपिट

हिक्मत नेपाली,विभेद बिरुद्ध अभियान , पुस १० - दैलेख । दैलेखको नौमूले गाँपालिका वडा न. ६ मा रहेको शिवशक्ति मावीमा कार्यरत शिक्षकमाथी कुटपिट भएको छ । आइतवार कक्षामा पढाइरहेको बेला शिवशक्ति माविका सहायक शिक्षक नमराज नेपालीमाथि आइतबार कुटपिट भएको हो । कुटपिटमा परेका शिक्षक नेपालीले आफूलाई नेपाल तरुण दलका जिल्ला सभापति लालबहादुर चन्दले कुटपिट गरेको आरोप लगाएका छन् । आइतबार बिहान सवा ११ बजेतिर विद्यालयको चौरमा विद्यार्थीहरुलाई वरिपरी राखेर घाम ताप्दै पढाई रहेको बेला एक्कासी चन्दले आफूलाई आक्रमण गरेको नेपालीले बताए ।

‘नमराज सरले पढाइरहनुभएको थियो, विद्यालय हातामा आएर लालबहादुरले बोलाएर लात्तीलात्तीले कुटेको हामीले देख्यौं’ बालविकास सहजकर्ता पार्वती सुबेदी र प्रधानाध्यापक मानबहादुर रावल भने ‘कुर्चीले हानेपछि हामी छुट्टयाउन गयौँ, त्यसपछि नमराज सर भागेर जंगलतिर जानुभएछ । ’

‘नजिकै अरु कक्षाहरु पनि पढाई भइरहेकै थियो, म कक्षा ३ को नेपाली विषय विद्यालयको चौरमै पढाइरहेको बेला उसले बोलाएपछि किन पो हो भनेर नजिक गएँ । ताकेरै गुप्ताङ्गमा लात्ती सोझ्याएको चाल पाएर मोडिएँ अनि तिघ्रामा लाग्यो ।’ उनले भने । लात्तीले ३–४ पटक हानेपछि पनि काठको कुर्ची तोकेको देखेर भाग्दै गर्दा ढाडमा चोट लागेको पीडित शिक्षक नमराज नेपालीको भनाइ छ ।

टेलिफोन गरेर घटनाबारे सोध्दा नेपाल तरुण दलका जिल्ला सभापति चन्दले सामान्य विवाद भएको हो, ठूलो विषय नबनाई दिनुहोला भनेर आग्रह गरे । चन्दले अघिल्लो वर्ष २०७३ कात्तिक १३ गते कोठामा मस्त सुतेका शिक्षक नमराजको मुखमा वियरको बोतल कोच्याएको फोटो खिची फेसबुकमा ‘यस्ता त शिक्षक के शिक्षा दिन्छन ?’ भन्दै पोस्ट गरेका थिए ।

सामाजिक सञ्जाल फेसबुकमा बेइज्जती र अपमान गरेको भन्ने नमराजको निवेदनमा जिल्ला प्रहरी कार्यालय दैलेखले कात्तिक १८ गते अभद्र व्यवहार नगर्ने सर्तमा मिलापत्र गराएको थियो ।

चन्दविरुद्ध यस्तो दुव्र्यवहार गरेका ३ वटा उजुरी प्रहरीमा पुगेका छन । उनलाई खोज्न घरमा गएको प्रहरीले नभेटाएर फर्किन नपाउँदै यो घटनाको सूचना प्रहरीलाई पुगेको थियो ।

कक्षामा पढाइरहेको शिक्षकमाथि कुटपिट गर्ने व्यक्तिलाई कारवाहीको माग गर्दै दैलेखका शिक्षकहरुका पेशागत संगठनहरुले प्रेस विज्ञप्ति जारी गरेका छन । नेपाल शिक्षक संगठनका अध्यक्ष नरबहादुर थापा तथा सचिव खगेन्द्र श्रेष्ठ र एकीकृत अखिल शिक्षक संगठनका जिल्ला अध्यक्ष बिसाखर तथा सचिव गणेश कार्कीले जारी गरेकोे प्रेस विज्ञप्तिमा प्रहरीले अबिलम्व पक्राउ गरी कारवाही नथाले आन्दोलन गर्ने उल्लेख छ ।