विभेद बिरुद्ध अभियान - काठमाडौँ, १२ फागुन । विभिन्न राजनीतिक दलका नेताले दक्षिण एसियामा व्याप्त जातीय भेदभाव तथा छुवाछूत अन्त्यका लागि साझा रूपमा पहल गर्नुपर्नेमा जोड दिएका छन् ।
नेपाल राष्ट्रिय दलित मुक्तिमोर्चा, अन्तर्राष्ट्रिय विभागद्वारा यहाँ आज आयोजित ‘नेपाली दलित आन्दोलन अन्तर्राष्ट्रियकरणको आवश्यकता र चुनौती’ विषयको अन्तत्र्रिmयामा नेकपा (माओवादी केन्द्र) का नेता नारायणकाजी श्रेष्ठले जातीय भेदभाव तथा छुवाछूत समस्या नेपालका दलित समुदायको मात्र नभई दक्षिण एसियाकै साझा समस्या भएको हुँदा यसको अन्त्यका लागि एकीकृत रूपमा पहल गर्नुपर्ने धारणा राख्नुभयो ।
“जातीय भेदभाव तथा छुवाछूतको समस्या नेपालको मात्र समस्या होइन, यो समस्या छिमेकी मुलुक भारत र बङ्गलादेश, पाकिस्तान, भुटानलगायतका मुलुकमा पनि उत्तिकै छ, यसको अन्त्य गर्न सबै लाग्नुपर्छ”, उहाँले भन्नुभयो ।
नेकपा (एमाले) का स्थायी समिति सदस्य छविलाल विश्वकर्माले सदियौँदेखि आर्थिक, सामाजिक र सांस्कृतिक रूपमा पछाडि पारिएको नेपालका दलित समुदायले जातीय भेदभाव तथा छुवाछूतका कारण ज्यान गुमाउँदा समेत छुवाछूत अन्त्यका लागि सरकारले कुनै पहल नगरेको गुनासो गर्नुभयो ।
नेकपा (माओवादी केन्द्र) का नेता विश्वभक्त दुलालले दलित, महिला, मधेसी र आदिवासी जनजातिलगायत उत्पीडित समुदायलाई अधिकार दिलाउनका लागि जतिसक्दो चाँडो संविधान कार्यान्वयन गर्नुपर्नेमा जोड दिनुभयो ।
No comments:
Post a Comment