मिर्गाैला रोगी तेजबहादुर नेपालीलाई प्रवासबाट रु तीन लाख सहयोग

८ बैशाख,विभेद बिरुद्ध अभियान - मोरङ जिल्लाको इटहरा–१ लक्ष्मी चोकका मिर्गाैला रोगी तेजबहादुर नेपाली (विक्रम)लाई रु तीन लाख बराबरको आर्थिक सहयोग हस्तान्तरण गरिएको छ ।

पीडित नेपालीको उपचारका लागि देश विदेशबाट प्राप्त भएको रु तीन लाख सात हजार ३५ बुलेट गाइज क्लब इटहराले सोमबार बेलुका हस्तान्तरण गरेको हो । इटहरा समाज कतारबाट रु एक लाख एक हजार ७८०, दक्षिण कोरियाबाट इटहरा–२ निवासी विनोद तामाङको अगुवाइमा त्यहाँ रहेका नेपालीबाट रु एक लाख उहाँको उपचारका लागि पठाइएको थियो । यस्तै, विभिन्न देशबाट विक्रमको उपचारका लागि सहयोग सङ्कलन भएको थियो ।

पीडित नेपालीले राससलगायत अन्य सञ्चारमाध्यमलाई उपचारको सहयोगका लागि याचना गरेपछि सहयोगको याचना गर्दै विभिन्न सञ्चारमाध्यममा समाचार प्रकाशित भएको थियो ।

रकम हस्तान्तरण कार्यक्रममा बुलेट गाइज क्लबका सचिव विदुर बस्नेत, रविन श्रेष्ठ, खगोल न्यौपाने, खगेन्द्र भट्टराईका साथै सहयोग सङ्कलनमा सक्रिय भीम कार्की, सन्तोष पुरी, ललित कार्की र इटहरा प्रहरी चौकीका इन्चार्ज केशव नेपाललगायतको सहभागिता रहेको थियो ।

३४ बर्षीय नेपालीले उपचारका क्रममा आफ्नो जाथजेथा सकिएको र थप उपचार गर्ने रकम नभएपछि थप सहयोगको याचाना गर्नुभएको छ ।  हाल डाईलोसिस गरिरहनुभएका नेपालीले आफ्नो उपचारका क्रममा १५ लाख रुपैंया सकिएको र डाक्टरले अब ८ लाख रुपैंया लाग्छ भनेको बताउनुभयो ।
‘उपचारका क्रममा आफ्नो क्षमताले भ्याए सम्म खर्च गरिसकियो, निराश हुँदै गोल्डेन हस्पिटल बिराटनगरमा उपचार गरिरहेका नेपालीले भन्नुभयो,‘उपचार गरेर बाँच्न मन छ, सहयोगको हात फिजाउदछु ।’ नेपालीलाई सहयोग गर्न चाहानुहुने माहानुभवाले उहाँकी श्रीमती गंगादेबी बर्देवालाई ९८१७३४५५६९ र स्थानीय युवा भुपाल कार्कीलाई ९८०१४४१४०० सम्पर्क गरेर सहयोग गर्न सक्नुहुनेछ । तेजबहादुरका अनुसार आमाले मृगौला दिने तयारी भईरहेको छ ।