तामाङको घटनाप्रति दोषीमाथि तत्काल कारवाहीको माग

काठमाडौँ, माघ १५ गते । अन्र्तजातीय बिवाहका कारण माइतीले कुटपीट गरेपछि अस्पताल भर्ना भएकी चितवन जुटपानी—७ सूर्यपुरकी संगीता तामाङको घटनाप्रति राष्ट्रिय दलित आयोगले दोषीमाथि तत्काल कारवाहीको माग गरेको छ । चारवर्ष अघि स्थानीय परियार थरका युवासँग बिवाह गरेकी तामाङलाई १३ गते सार्वजनिक इनारमा पानी भर्दै गर्दा आमा धनमाया तामाङ दिदी शर्मिला तामाङ, बुवा उवे तामाङ लगायत चार जनाले कुटपीट गरेको आयोगले जनाएको छ । 

आयोगले बिहिवार विज्ञप्ति जारी गरी घटनाको भत्सर्ना गरेको छ । छानवीन र तत्काल कारपाहीको पनि माग गरेको छ । दलितमाति यस्ता घटनाहरु बारम्वार घटिरहेको तर कानूनी कारवाही हुन नसकिरहेको भन्दै आयोगले सरकारको ध्यानाकर्षण गराएको छ । जातीय भेदभाव तथा छुवाछूतको सो घटना निन्दनीय रहेको आयोगका अध्यक्ष मानबहादुर नेपालीले बताउनुभयो । 

उहाँ भन्नुहुन्छ,‘सार्वजनिक स्थानमा भएको जातीय भेदभावको घटना र त्यसमा पनि दलितसँग बिवाह भएको भन्दै कुटपीट हुनमा दलित आयोगको गम्भीर ध्यानआकर्षण भएको छ, हामी घटनाको सत्यतथ्य अनुसन्धान गर्दै छौँ, तर तत्काल दोषीलाई कारवाहीको माग गदछौ’। अध्यक्ष नेपालीका अनुसार यस्ता घटना आगामी दिनमा हुन नदिन पनि घटनाको छानवीन र दोषीमाथि कारवाही गरिनुपर्छ । साथै जातीय भेदभाव तथा छुवाछूत (कसूर र सजाय) ऐन २०६८ प्रभावकारी कार्यान्वयन गर्न पनि आयोगले माग गरेको छ । 

घटनापछि अस्पताल भर्ना भएकी तामाङले इलाका प्रहरी कार्यालय टाडीमा जातीय भेदभावविरुद्ध उजुरी दिएकी छन् । हाल प्रहरीले चार जनामध्ये तीन जनालाई पक्राउ गरेको जनाइएको छ । तामाङलाई माइतिले पटक—पटक मानसिक यातना दिदै आएका थिए ।