कञ्चनपुर, असोज २५ गते । मुक्त हलिया समस्या समाधान पुनःस्थापना समिति कञ्चनपुरले २० परिवार मुक्त हलियालाई पुनःस्थापना गरेको छ ।
मुक्त हलिया पुनःस्थापन कार्यविधि २०७० र गठन आदेश २०७१ अनुसार ‘क’ वर्गको परिचयपत्र पाएका र घर जग्गा नभएकालाई प्राथमिकतामा राखेर पुनःस्थापन गरिएको हो ।
पुनःस्थापन गरिएका प्रत्येक परिवारलाई साढे आठ धुर अर्थात् १४४ वर्गमिटर जग्गा उपलब्ध गराइएको राष्ट्रिय मुक्त हलिया समाज कञ्चनपुरका अध्यक्ष शिवि लुहारले बताउनुभयो ।
“सुडाको गाउँजीमा हलिया परिवारलाई पुनःस्थापन गराइएको छ” उहाँले भन्नुभयो । पुनःस्थापनमा पर्नेमा कृष्णपुरका दुई, देखतभूलीका एक, झलारीका छ पिपलाडीका दुई, सुडाका दुई र भीमदत्त नगरपालिकाका सात परिवार रहेका छन् ।
पुनःस्थापन गरिएका परिवारलाई जग्गा चिनाउने र जग्गाधनी पुर्जा उपलब्ध गराउने कार्य भइसकेको अध्यक्ष लुहारले बताउनुभयो । ख वर्गको परिचयपत्र पाएका २० मुक्त हलिया परिवारलाई रु एक लाखका दरले घर मर्मतका लागि रकमसमेत प्रदान गरिएको जानकारी उहाँले दिनुभयो ।
कञ्चनपुरमा प्रमाणीकरणमा परेका मुक्त हलिया परिवारको सङ्ख्या एक हजार ३३८ रहेकामध्ये ७७५ जनाले परिचयपत्र पाएका छन् । रासस
No comments:
Post a Comment