मुस्लिम, मधेसी र दलित समुदायमा बालविवाह बढी

खजुरा (बाँके),  असोज २ गते  । शिक्षा, स्वास्थ्य र पूर्वाधारको पहुँच रहेको बाँके जिल्लामा बालविवाह बढ्दो रहेको पाइएको छ । २० वर्ष उमेर नपुगी विवाह गर्नु बालविवाह हुने भए पनि जिल्लामा हुने अधिकांश विवाह बालविवाह हुने गरेको पाइएको हो । 

सामाजिक संस्कार, जानीनजानी, देखासिकीका कारण जिल्लामा बालविवाह बढ्दो छ । राष्ट्रिय जनगणना २०६८ अनुसार जिल्लामा १० वर्षमुनिका एक हजार ८५४ जनाले बालविवाह गरेका छन् । जसमा बालिका एक हजार ५८९ र बालक २६५ जनाले बालविवाह गरेको तथ्याङ्कमा उल्लेख छ । 

जनगणनाअनुसार १० देखि १४ वर्षको उमेर समूहमा ३२ हजार ६७६ जनाले जिल्लामा बालविवाह गरेका छन् । जसमा बालिका २५ हजार ६६५ र बालक छ हजार ४११ जना रहेका छन् । १५ वर्षदेखि २० वर्ष उमेर समूहमा एक लाख नौ हजार ५० जनाले बालविवाह गरेका छन् । तथ्याङ्कअनुसार बालिका ८० हजार ३०६ र बालक ४८ हजार ७४४ जनाले विवाह गरेका छन् । 

जनगणनाको १० वर्षमा  जिल्लामा एक लाख ६३ हजार ५८० जनाले बालविवाह गरेका छन् । जसमा एक लाख सात हजार ५६० बालिका र ५६ हजार २० जना बालकले बालविवाह गरेको पाइएको छ । 

यस अवधिमा बालकभन्दा बालिका विवाह दुई गुणा बढी रहेको छ । बालविवाह गर्नेमा जिल्लामा दलित, मधेसी र मुस्लिम समुदायका बालबालिका अगाडि रहेका छन् । मुस्लिम, मधेसी र दलित समुदायमा बालविवाह बढी रहेको छ । 

महिला तथा बालबालिका कार्यालय बाँकेका प्रमुख प्रभा श्रेष्ठले जिल्लामा बालविवाह बाँकी रहे पनि विगतका वर्षभन्दा कमी आएको दाबी गर्नुभयो । “बालविवाह अहिले लुकीछिपी हुने गरेको छ”–उहाँले भन्नभयो–“कानुनी रूपमा यस्तो विवाह गर्ने गराउनेलाई कारबाही र विवाह बदर हुने व्यवस्था रहेको छ ।”

बालविवाहका घटना बढे पनि कानुनी कारबाहीको प्रक्रियामा भने नआएको जिल्ला प्रहरी कार्यालयले जनाएको छ । एक वर्षमा जिल्ला प्रहरी र जिल्ला अदालतमा एउटा मात्र बालविवाहको मुद्दा परेको छ । रासस