दार्चुलामा दलित छात्र छात्रालाई प्रदान गरिने छात्रवृत्ति रकम अपुग

दार्चुला । ०७१ फागुन १५ गते 

दलित छात्र छात्रालाई प्रदान गरिने छात्रवृत्ति रकम अपुग भएको जिल्ला शिक्षा कार्यालयले जनाएको छ । कार्यालयका अनुसार दलित छात्रवृत्तितर्फ ३ हजार ३ सय १५ जना छात्राहरूलाई १३ लाख २६ हजार रुपियाँ अपुग भएको हो ।कक्षा १ देखि कक्षा ८ सम्मका १५ हजार ६ सय २४ जना विद्यार्थीको लागि ६२ लाख ४९ हजार ६ सय रकम आवश्यक हुन्छ । जिल्ला शिक्षा कार्यालयका शाखा अधिकृत रामदत्त भट्टले भने, मन्त्रालयबाट १२ हजार ३ सय ९ विद्यार्थीको लागि ४९ लाख २३ हजार ६ सय रुपियाँ मात्र निकासा गरेको छ ।

रकम नै अपुग भएपछि जिल्ला शिक्षा कार्यालयले प्रति विद्यार्थी शून्य दशमलव ७८ प्रतिशतका दरले रकम वितरण गरेको छ शाखा अधिकृत भट्टले भने, सबैलाई पुग्ने गरी दिएका छौँ । मन्त्रालयले प्रति विद्यार्थी ४ सयका दरले दलित छात्रवृत्ति उपलब्ध गराउँदै आएको छ ।

छात्रवृत्ति रकम थप गर्न मन्त्रालयसँग माग भएको छ, भट्टले भने, बँाकी निकासा भएपछि सबैलाई पूरा कोटा अनुसार वितरण गरिने छ । विद्यालयहरूले पनि शिक्षाबाट प्राप्त बजेटकै आधारमा बाँडफाँड गर्ने तयारी गरेका छन् । रकम कम पुगेकोले विद्यालय व्यवस्थापन समितिको बैठक बसालेर छात्रवृत्ति रकम बाँडफाँड गरिने शङ्करपुर उमावि पस्तीका प्रधानाध्याक धनञ्जय पन्तले बताए ।