श्रीमतीको हत्या गरेर प्रहरी चौकीमा हाजिर

विराटनगर, कात्तिक १६ –  तेह्रथुममा एक व्यक्ति श्रीमतीको हत्या गरेर प्रहरी चौकीमा हाजिर हुन गएका छन् ।  म्याङलुङ नगरपालिका ५ मा श्रीमतीको हत्या गरी डेढ बर्षको छोरा साथमा लिई एक पुरुष प्रहरीमा हाजिर हुन गएका हुन ।

ताप्लेजुङको फुङलिङ ७ स्थाई घर भई तेह्रथुमको म्याङलुङ नगरपालिका ५ बस्दै आएका ४५ वर्षका दलबहादुर बिश्वकर्माले श्रीमती ४० वर्षकी बिमला सार्कीको हत्या गरी प्रहरी चौकी पुगेर हत्या स्वीकार गरेका छन् । उनले गएको शुक्रबार १२ बजे श्रीमतीको हत्या गरेको बताएका छन् ।

हत्यामा प्रयोग भएको हसियासहित प्रहरीको पुगेका दल बहादुरले श्रीमतीको शवलाई भान्छा कोठामा साडीले छोपेर राखेको छु भनेपछि प्रहरी घटनास्थलमा पुगेको थियो । प्रहरी टोलीले शव फेला पारेपछि दलबहादुरलाई हिरासतमा राखेर आवश्यक अनुसन्धान भइरहेको क्षेत्रीय प्रहरी कार्यालय बिराटनगरले जनाएको छ ।