जातीय भेदभावमा शून्य सहनशीलता अपनाउनु पर्ने

स्याङ्जा, ११  असार- विभेद बिरुद अभियान । महान्यायधीवक्ताको कार्यालयका सहन्यायधीवक्ता एवं प्रवक्ता गोपालप्रसाद रिजालले जातीय भेदभावमा शून्य सहनशीलता अपनाउनु पर्ने बताएका छन्।महान्यायधीवक्ता कार्यालयको आयोजनामा मङ्गलबार स्याङजामा आयोजित जातीय भेदभाव र जोखिममा रहेका वर्ग विरुद्धका कसुरसम्बन्धी छलफलमा प्रवक्ता रिजालले यस्तो बताएका हुन्।

जिल्ला न्यायाधीश चिन्तामणि बरालले उच्च पदस्थ सार्वजनिक पद धारणा गरेका व्यक्तिले जातजातिबीचको विभेद हटाउने कार्य गरेमा जातीय विभेद हट्ने बताए।न्यायाधीश डिल्लीरमण तिवारीले कानुनी घटनाको उजागर भएमा मात्र कानुनी उपचार पाइने बताउँदै जातीय विभेद सहन नहुनेमा जोड दिए।

छलफलमा स्याङ्जाका प्रमुख जिल्ला अधिकारी जनकराज पन्त, स्थानीय विकास अधिकारी पुण्यविक्रम पौडेल, प्रहरी निरीक्षक इन्द्रप्रसाद सुवेदी, नागरिक समाजका अध्यक्ष ओमप्रकाश शर्मा, अधिवक्ता पारश शर्मा, प्रकाश अर्याल, वार एशोसियशनका अध्यक्ष नारायणप्रसाद रैग्मी, महिला अधिकारकर्मी अमृता अर्याल, बालअधिकार अधिकृत वद्री वाग्लेलगायतले बोलेका थिए।

कार्यक्रममा दलित समन्वय समितिका उपाध्यक्ष लिलबहादुर रनपाल, पूर्व उपाध्यक्ष तिलक विश्वकर्मा, अधिवक्ता संगीता नेपाली, शिव नेपाली, सुनचाँदी व्यवसायी संघका पूर्णबहादुर विकलगायतले बोलेका थिए।छलफल कार्यक्रममा उपन्यायाधीवक्ता गंगाप्रसाद पौडेल र जिल्ला न्यायाधीवक्ता धर्मराज पौडेलले सहजीकरण गरेका थिए।