लमजुङ, ११ असार- विभेद बिरुद अभियान ।कुनै बेला दलितलाई देख्दा हेप्ने, उनीहरूसँग छोइँदा छिटो हाल्दै अछूतको व्यवहार गर्ने क्षेत्रीहरूको बाहुल्य रहेको लमजुङको एक गाउँका भूकम्प पीडितलाई एक दलित युवाले छ लाख नगद सहयोग गरेका छन्।
द युनाईटिङ हृयाण्ड्स फाउण्डेसन अष्ट्रेलियाका अध्यक्ष होमबहादुर प्यासी -परियार) द्वारा संस्थाको तर्फबाट सिम्पानी-३, भलाम गाउँमा आयोजित कार्यक्रममा सो रकम वितरण गरिएको हो।सोही वडामा रहेको शान्ति आमा समूहको भवन समेत भूकम्पले भत्काएको हुँदा त्यसको पुनर्निर्माणका लागि समूहकी अध्यक्ष मायादेवी भण्डारी होमबहादुरको हातबाट नगद दुर्इ लाख रुपैयाँ प्राप्त गरिन्। दलित समुदायका व्यक्तिबाट त्यसरी सहयोग रकम हातमा पर्दा उनी निकै हषिर्त मुद्रामा थिइन्।
उनीमात्र होइन सो राहत वितरण कार्यक्रममा राहत प्राप्त गरेका अधिकांश गैर दलित गाउँलेहरू पनि दलित समुदायका व्यक्तिहरूले भूकम्पले भत्काएको आमा समूहको भवन निर्माणका साथै भूकम्पबाट पीडित भएका परिवारका लागि गरेको सहयोगको मुक्त कण्ठले प्रशंसा गर्दै थिए।
सो अवसरमा सिम्पानी गाविसका भूकम्पपीडित ४६ परिवारलाई प्रतिपरिवार पाँच हजारका दरले नगद दुर्इ लाख ३० हजार पनि वितरण गरियो।सिम्पानीमा स्थायी बसोबास भई विगत १० वर्षदेखि अस्टे्रलियामा रेष्टुराँ व्यवसाय सञ्चालन गर्दै आएका होमबहादुरले आफ्नो रेष्टुरेण्टमा राखेको च्यारिटी वक्सबाट उठेको रकम आमा समूहको भवन निर्माणका साथै समुदायका भूकम्प पीडितलार्ई प्रदान गरिएको बताए। उनका अनुसार बेसीसहर नगरपालिकाको मैयुम् गाउँका भूकम्प पीडित ३४ घरपरिवारलाई पनि पाँच हजारका दरले एक लाख ७० हजार सहयोग रकम प्रदान गरिसकिएको छ।
बेसीसहरको मैयूँमा आयोजित राहत रकमको वितरण कार्यक्रममा काङ्ग्रेसका जिल्ला सचिव एवम मस्र्याङ्दी क्याम्पसका उपप्राध्यापक आनन्द घिमिरे प्रमुख अतिथि थिए।उनले काङ्ग्रेसले आफ्नो स्थापनाकालदेखि नै दलितको समस्या समाधान गर्न अग्रसर रहेको बताउँदै यस्तो विपदको बेलामा बिनाविभेद सहयोगी हात जुट्नुपर्छ भन्ने यो एक उदाहरण भएको दाबी गरेका थिए।
No comments:
Post a Comment