उर्लाबारी, असार ११ -विभेद विरुद्ध अभियान ।मोरङ उर्लाबारीका मुर्तिकार मञ्जुल मितेरी बराईली सरकारको युवा प्रतिभा खोजी पुरस्कारबाट पुरस्कृत हुने भएका छन् । सरकारले पहिलो पटक प्रदान गर्न लागेको यस पुरस्कारबाट मोरङ टाँडी गाविस–५ घर भई हाल उर्लाबारी नगरपालिका–३ मा बस्दै आएका मितेरी पुरस्कृत हुन लागेका हुन् ।
५० हजार राशीको पुरस्कारबाट मितेरीलाई यही असार २१ गते पुरस्कृत गर्ने कार्यक्रम रहेको युवा तथा खेलकुद मन्त्रालयले जनाएको छ ।
३४ बर्षिय मितेरी विगत १५ बर्षदेखि मूर्ति निर्माण कार्य गर्दै आएका छन् । आकर्षक मूर्ति निर्माण गर्न सक्ने प्रतिभा भएका मितेरीका बारेमा स्थानीयसँगै राष्ट्रिय पत्रपत्रिकाहरुमा प्रकासित उनको प्रतिभा बारेको समाचारका आधारमा सरकारले उनलाई युवा प्रतिभा खोजी पुरस्कारबाट पुरस्कृत गर्ने निर्णय गरेको हो । उर्लाबारी–२ मा मूर्तिकला केन्द्र स्थापना गरेर व्यवसायिक रुपमा मूर्ति निर्माण गर्दै आएका उनले मञ्जुल संग्राहलय स्थापना गरी विश्व प्रसिद्ध व्यक्तित्वहरुको १ हजार वटा मूर्ति निर्माण गरी सरकारलाई हस्तान्तरण गर्ने घोषणा गरेका छन् ।
यस अन्तर्गत उनले अहिलेसम्म १५० जना विश्व प्रसिद्ध व्यक्तित्वको मूर्ति तयार गरिसकेका छन् । सरकारले उनीसँगै अन्य विभिन्न विधाका ३५ युवा तथा दुई सामाजिक संस्थालाई यस पुरस्कृतबाट पुरस्कृत गर्न लागेको छ ।
सरकारले सबैलाई जनही ५० हजार रुपैयाँको दरले पुरस्कृत गर्ने भएको हो ।
साभार # हिमाली पोस्ट
No comments:
Post a Comment